बिहिवार, कार्तिक १३ २०८३Oct 29 2026
- ताजा अपडेट :
बिहिवार, कार्तिक १३ २०८३Oct 29 2026
शुक्रवार, बैशाख ८ २०८०
नेपाल वाइड
खोटाङ, ८ बैसाख । डढेलोले पाईप जलाउँदा खोटाङको हलेसी तुवाचुङ नगरपालिका–५ दुर्छिमस्थित रातमाटे आधारभुत विद्यालयमा खानेपानी आपुर्ती बन्द भएको छ ।
सामुदायीक वनमा लागेको डढेलोले खानेपानीको पाईप जलेपछि बिहिबारदेखि विद्यालयमा खानेपानीको आपुर्ती बन्द भएको विद्यालय व्यवस्थापन समितिका अध्यक्ष राजन राईले बताए ।
साविक दुर्छिम–२ मा पर्ने स्थानीय मार्से सावाला कुर्ले सिद्धेबारी सामुदायीक वनमा लागेको डढेलोले रमितेपाखा मुहान भएको खानेपानीको पाईप जलेको हो ।
भीरैभीर भएको ठाउँमा जमिनमा गाड्न सम्भव नभएपछि बाहिरै तन्काएर राखिएको करिब पाँच सय मिटर पाईप डढेलोले जलेको हो । प्यालाभिरदेखि मुहानसम्मको खण्डको कतिपय पाईप जलेर टुक्रा–टुक्रा भएको र कतिपय पाइप पड्केर फुटेको विव्यास अध्यक्ष राईले बताए ।
बैसाख ६ गते सुरु भएको डढेलो वन क्षेत्र डढिसकेपछि आफै निभेको छ । स्थानीय र प्रहरीले बस्ती नजिक पुगेको डढेलो नियन्त्रण गरेर घरहरु जोगाएका छन् । साविक दुर्छिम–३ छापडाँडा तेलाभीरमा डढेलोले छाडिसकिएको केही घर जलेको निवर्तमान वडासदस्य फलामसिं राईले बताए ।
यस्तै, डढेलोले जन्तेढुंगा गाउँपालिका–४ डम्बर्खुशिवालय सामुदायीक वन कात्तिके सखाप बनाएको छ । बैसाख ६ गते साँझदेखि सुरु भएको भिषण डढेलोले सामुदायीक वन सखाप बनाएको हो ।
हावाहुरीका कारण डढेलो नियन्त्रण गर्न नसकिएको डम्बर्खुशिवालय सामुदायीक वन कात्तिकेका अध्यक्ष नृपबहादुर चौंलागाईले बताए । वन क्षेत्र डढिसकेपछि धेरैजसो डढेलो आफै नियन्त्रणमा आएको छ । बाँकी रहेको डढेलो काभ्रेखोला पुगेपछि आफै नियन्त्रणमा आउने स्थानीयले बताएका छन् ।
