खोटाङ, १७ वैशाख । ‘द भ्वाईस अफ नेपाल’ छैटौँ सिजनमा फाइनल राउण्डमा पुगेका प्रतियोगी रोशन राई ‘पालुवा स्टार’ भोटको अपिल गर्दै गृह जिल्ला खोटाङ आइपुगेका छन् । उपाधि जित्ने दौडमा रहेका खोटाङ दिप्रुङ चुइचुम्मा गाउँपालिका–७ टेम्माका प्रतिभाशाली गायक रोशनलाई बुधबार दिक्तेल बजारमा भव्य स्वागत गरिएको छ ।

कोच मेलिना राईको टिमबाट फाइनलमा पुगेका रोशनलाई स्थानीयहरूले साँस्कृतिक झाँकीसहित स्वागत गरे । दिक्तेल बजारको माउण्ट एभरेष्ट बोर्डिङ स्कूलले आयोजना गरेको ‘रोशन राई जिताउ अभियान’ सहितको साँगीतिक कार्यक्रममा प्रस्तुति दिन रोशन जिल्ला आईपुगेका हुन् ।

रोशन र उनको टोलीलाई दिक्तेलस्थित किँरातचोकदेखि हाटडाँडा हुँदै त्रिवेणीचोकमा आयोजित कार्यक्रमस्थलसम्म विभिन्न र्‍यालीसहित स्वागत गरिएको थियो । पालुवास्टारको रूपमा परिचित रोशनले माउण्ट एभरेष्ट बोर्डिङमा कक्षा ३ देखि माध्यमिक तह (एसएलसी) सम्म पूर्ण छात्रवृत्तिमा अध्ययन गरेका थिए ।

गायन प्रतिभामा अब्बल देखिएका कारण विद्यालयले उनलाई पूर्ण छात्रवृत्ति प्रदान गरेको थियो । कार्यक्रममा रोशनसँगै खोटाङकै गायिका मनिता राई र गायक तथा संगीतकार हसन राईलगायतले गायन प्रस्तुति दिए ।

रोशनकी कोच गायिका मेलिना राई आउने भनिए पनि विशेष कारणले आउन नसकेको जनाइएको छ । कार्यक्रममा रोशनका लागि स्वेच्छिक आर्थिक सहयोग समेत जुटाइएको थियो ।

‘द भ्वाइस अफ नेपाल’को छैटौँ सिजनमा रोशनलाई जिताउन माउण्ट एभरेष्ट बोर्डिङले मात्रै एक लाख भोट उपलब्ध गराउने प्रतिबद्धता जनाएको छ । विद्यालयका सहायक प्रधानाध्यापक सगुन ताम्राकारले भने, “हाम्रो विद्यार्थी ’द भ्वाइस अफ नेपाल’को फाइनलिस्ट हुनु हाम्रा लागि गौरवको विषय हो । रोशनलाई उपाधि जिताउन सबैको सहयोग आवश्यक छ । बोर्डिङको तर्फबाट मात्रै एक लाख भोट उपलब्ध गराउने निर्णय गरेका छौँ ।” रोशनलाई जिताउने अभियानमा विद्यालयसहित जिल्लाका विभिन्न संघ–संस्था र व्यक्तिहरू जुटेका छन् ।

भोट अपिलकै लागि बिहीबार उनको गृह पालिका दिप्रुङ चुइचुम्मा र छिमेकी साकेला गाउँपालिकामा समेत कार्यक्रम आयोजना गरिएको रोशन राई जिताउ अभियानका सहभागीहरूले जनाएका छन् । देशविदेशमा आफ्नो प्रस्तुति दिइसकेका रोशनका विभिन्न गीतहरू पहिले नै लोकप्रिय बनिसकेका छन् ।

गायनसँगै संगीतमा समेत खुबी राख्ने रोशन ‘द भ्वाइस अफ नेपाल’को छैटौँ सिजनका बलिया प्रतिस्पर्धीमध्ये एक मानिन्छन् । हिमालय टेलिभिजनबाट हरेक शुक्रबार र शनिबार राति प्रसारण हुने यस गायन रियालिटी शोको यही सिजनमा खोटाङकै इन्द्रकला राई पनि अघिल्लो चरणसम्म पुगेकी थिइन् ।

एउटै जिल्ला र समुदायका दुई प्रतिस्पर्धी भएका कारण शुभचिन्तकहरूका भोट बाँडिएको थियो । तर कोच खेम सेन्चुरीको टिममा रहेकी दिक्तेल रुपाकोट मझुवागढी नगरपालिका–१४ बुइपाकी इन्द्रकला बाहिरिएपछि रोशनलाई उपाधि चुम्न सहज हुने आँकलन गरिएको छ । ‘द भ्वाइस अफ नेपाल’को ग्रान्ड फिनाले आगामी वैशाख १९ गते शुक्रबार हुँदैछ ।

फाइनल राउण्डमा टिम मेलिनाबाट रोशन राई, टिम उदय सोताङबाट अर्पणा आचार्य, टिम खेम सेन्चुरीबाट प्रोसेस पाण्डे र टिम राजु लामाबाट प्रमेश राई प्रतिस्पर्धामा छन् ।