खोटाङ, २९ पुस । खोटाङको दिक्तेल रुपाकोट मझुवागढी नगरपालिकाका मेयर तीर्थराज भट्टराईले आफुबिरुद्ध जिल्ला प्रशासन कार्यालयमा उजुरी दिने उजुरीकर्तालाई फूलमाला लगाइदिएका छन् ।

एक ठेकेदारका लागि दिक्तेलस्थित विवेक मर्केन्डाइज एण्ड कन्सल्ट प्रालिबाट उधारोमा निर्माण सामग्री निकाल्न मेयर भट्टराई जमानी बसेका थिए तर ठेकेदारबाट ६ महिना बित्दा समेत भुक्तानी नभएपछि आफुबिरुद्ध प्रशासनमा उजुरी दिने विवेक मर्केन्डाइज एण्ड कन्सल्ट प्रालिका सञ्चालक अभिषेक कर्णलाई मेयर भट्टराईले फूलमाला लगाइदिएर धन्यवाद ज्ञापन गरेका छन् ।

उजुरी दिने कर्णलाई आइतबार नगरको सभाहलमा आयोजित पत्रकार सम्मेलनकाबीचमा मेयर भट्टराई र उपमेयर बिसन राईले फूलमाला लगाइदिएका थिए ।

मेयर भट्टराई दिक्तेल–आहाले (१०.९७४ किलोमिटर) सडक कालोपत्रेको ठेक्का लिएको याक्थुङहाङ/साप/सिरुवा जेभीका शिव चौंलागाईका लागि विवेक मर्केन्डाइज एण्ड कन्सल्टबाट उधारोमा १५ लाखको निर्माण सामग्री निकाल्न जमानत बसेका थिए ।

ठेकेदारले भुक्तानी नदिएपछि व्यवसायी कर्णले मेयर भट्टराई विरुद्ध पुस २२ गते जिल्ला प्रशासन कार्यालयमा उजुरी दिएका थिए । ‘मेरो व्यक्तिगत चेक दिएपछि मात्रै सामान दिन तयार भएकाले सोही बमोजिम मैले विकास निर्माण र नागरिक हितका लागि आयोजना नै सम्पन्न नगरी फर्किन लागेको अवस्थामा व्यक्तिगत चेक दिएर आयोजना बचाएको थियो,’ मेयर भट्टराईले भने, ‘व्यवसायीले १० दिनकालागि उधारो दिएको तर ६ महिनासम्म भुक्तानी नपाएर भौतारिँदाको अवस्थामा नगरप्रमुखविरुद्ध प्रशासनमा उजुरी दिनुभएकोमा सम्मान गर्न चाहन्छु । लोकतन्त्रको सुन्दर पक्ष भनेकै सानो ठूलो सबैले न्याय पाउनुपर्छ र अन्याय गर्ने जुनसुकै तहको होस् दण्डको भागिदारी हुनुपर्छ । यस घटनाबाट अन्याय गर्ने सबैले दण्डित हुनुपर्छ भन्ने पुष्टि गरेको छ ।’

मेयर भट्टराईले १० दिनभित्र भुक्तानी हुनेगरी गत असार ९ गते ठेकेदारकोतर्फबाट विवेक मर्केन्डाइज एण्ड कन्सल्टको नाममा १५ लाखको आफ्नै खाताको चेक काटिदिएर जमानी बसेका थिए ।

सहयोग गर्दा आफु विरुद्ध प्रशासनमा उजुरी परेपछि मेयर भट्टराईले पनि पुस २३ गते याक्थुङहाङ/साप/सिरुवा जेभीका चौंलागाई विरुद्ध गृह–मन्त्रालयमा उजुरी दिएका थिए ।

गृह–मन्त्रालयमा उजुरी पर्ने वित्तिकै चौंलागाईले विवेक मर्केन्डाइज एण्ड कन्सल्ट प्रालिको बाँकी रकम भुक्तानी गरिसकेको छ । याक्थुङहाङ/साप/सिरुवाले २०७६ साल चैत ७ गतेभित्र सम्पन्न गर्नेगरी २०७५ साल असोज १ गते सडक डिबिएसटी कालोपत्रेको सम्झौता गरेको थियो ।

राष्ट्रिय पुनःनिर्माण प्राधिकरणको भ्याट सहित २१ करोड १ लाख ८८ हजार खर्चमा कालोपत्रे सक्नेगरी सडक कालोपत्रेको ठेक्का लागेको थियो । तर कालोपत्रेको काम अलपत्र छ ।

दिक्तेल–आहाले सडक दिक्तेलबाट खानीडाँडा विमानस्थल हुँदै उदयपुरको गाईघाट जोड्ने छोटो दुरीको मार्गका रुपमा स्थापित हुनेछ । आयोजना तत्कालिन प्रतिनिधिसभा सदस्य बिशाल भट्टराईले २०७५ मंसिर १ गते शिलान्यास गरेका थिए ।

अस्पतालचोकबाट हाटडाँडा (केशव बस्नेतको घर)सम्म आरसिसि ढलान तथा सो स्थानदेखि आहालेसम्मको खण्डमा डिबिएसटी कालोपत्रे गर्ने सम्झौता छ । याक्थुङहाङ/साप/सिरुवा जेभीले खगेन्द्र राईमार्फत काम गर्दैआएको छ ।