खोटाङ । चैत ९, खोटाङको दिक्तेलमा आयोजित जिल्ला अन्तर क्लब पुरुष फुटबल प्रतियोगीताको दोश्रो संस्करणको पहिलो उपाधि युवा जागरण स्पोर्टस् क्लवले उचालेको छ । दिक्तेलको माटिकोरे खेलमैदानमा सोमबार भएको फाईनल खेलमा हलेसी तुवाचुङ नगरपालिका–१ बाहुनीडाँडास्थित बाहुनीडाँडा फुटबल क्लवलाई ० का बिरुद्ध १ गोल गर्दै युवा जागरण स्पोर्टस् क्लव दिक्तेलले प्रथम उपाधि उचालेको हो ।

पहिलो हाफमा जर्सी नम्बर ११ का खेलाडी डिकेन राईले गरेको गोल नै युवा जागरणको जितको लागि पर्याप्त भएको थियो । दुबैतर्फको दवावपूर्ण खेलमा पराजयसँगै बाहुनीडाँडा फुटबल क्लवले उपविजेतामा चित्त बुझाउनु परेको छ । ‘स्थानीय खेलाडीको विकास र पहिचान, खोटाङ फुटवल एकेडेमीको अभियान’ भन्ने नाराका साथ खोटाङ फुटबल एकेडेमी (केएफए)ले आयोजना गरेको प्रतियोगीतामा आयोजक केएफए र नेर्पा स्पोर्टस् क्लव सेमीफाईनलिष्ट बनेको छ ।

प्रतियोगीतामा प्रथम स्थान प्राप्त गर्ने टिमलाई नगद ८८ हजार ८८८, दोश्रो स्थान प्राप्त गर्ने टिमलाई ४४ हजार ४४४ र दुई वटा सेमिफाइनलिस्ट टिमलाई प्रतिटिम २२ हजार २२२ का साथमा ट्रफि, मेडल र प्रमाण–पत्र प्रदान गरिएको छ । विजेता टिमलाई एसियन थाइ फुड्सका खोटाङ इन्चार्ज नवराज श्रेष्ठ, खोटाङ उद्योग बाणिज्य संघका अध्यक्ष उपिनकुमार राई, हिमाली क्लवका अध्यक्ष खुसनारायण शैंजू, भुपु जमदार गोपाल श्रेष्ठ लगायतको हातबाट पुरस्कार हस्तान्तरण गरिएको छ ।

जिल्ला अन्तर क्लब पुरुष फुटबल प्रतियोगीताको उपविजेता बाहुनीडाँडा फुटबल क्लवका खेलाडी । तस्बिर : नेपालवाइड डटकम

प्रतियोगीतामा प्लेयर अफ द टुर्नामेन्टको उपाधि युवा जागरण स्पोर्टस् क्लवका आयन राईले जितेका छन् । उनलाई नगद ७ हजारका साथमा ट्रफि, मेडल र प्रमाण–पत्र प्रदान गरिएको छ । उत्कृष्ट गोल रक्षकको उपाधि युवा जागरण स्पोर्टस् क्लवकै गोल रक्षक नविन पोखरेल, उत्कृष्ट डिफेण्डरको उपाधि बाहुनीडाँडा फुटबल क्लवका शम्भु माझी, उत्कृष्ट मिड फिल्डरको उपाधि नेर्पा स्पोर्टस् क्लवका सन्तोक राई र उत्कृष्ट कोचको उपाधि युवा जागरण स्पोर्टस् क्लवका राजु आचार्यले पाएका छन् ।

उनीहरुलाई जनही ५ हजार नगद, ट्रफि, मेडल र प्रमाण–पत्र प्रदान गरिएको प्रतियोगीताका आयोजक खोटाङ फुटवल एकेडेमीका अध्यक्ष नूरकाजी सैजुले बताए । प्रतियोगीतामा जिल्लाका १३ टिमबिचमा प्रतिष्पर्धा भएको थियो । एकेडेमीले सहयोग उठाएरै जिल्ला अन्तर क्लब पुरुष फुटबल प्रतियोगीताको दोश्रो संस्करणको आयोजना गरेको हो ।

अन्तर क्लब पुरुष फुटबल प्रतियोगीतामा जिल्ला खेलकुद विकास समितिमा दर्ता भएको, दर्ता गरेको प्रमाण–पत्र भएको तथा वार्षिकरुपमा नवीकरण गरेको टिमलाई मात्र सहभागी गराइएको थियो । प्रतियोगीता अखिल नेपाल फुटवल संघ ‐एन्फा)का अध्यक्ष कर्माछिरिङ शेर्पाले गत बुधबार उद्घाटन गरेका थिए । प्रतियोगीता उद्घाटनका क्रममा एन्फा उपाध्यक्ष उपेन्द्रमान सिं, चर्चित फुटबलर हरि खड्का लगायतको उपस्थिति रहेको थियो । ‘खेलकुदको अभियान खोटाङको पहिचान’ भन्ने नारा सहित २०७३ सालमा स्थापना भएको एकेडेमीले २०७४ सालमा जिल्ला अन्तर क्लब पुरुष फुटबल प्रतियोगीताको पहिलो संस्करण आयोजना गरेको थियो ।

केएफए भेट्रानद्धारा पत्रकार पराजित

प्रतियोगीताको फाईनल खेल अगाडि पत्रकार र आयोजक केएफए भेट्रान टिमबिच भएको मैत्रीपूर्ण खेलमा आयोजक भेट्रान टिम विजयी भएको छ । सडेन डेथमा पत्रकारलाई ३ का बिरुद्ध ४ गोल गर्दै केएफए भेट्रान टिम विजयी भएको हो । निर्धारित समय गोल रहित सकिएपछि खेल पेनाल्टी सुटआउटमा पुगेको थियो ।