बिहिवार, कार्तिक १३ २०८३Oct 29 2026
- ताजा अपडेट :
बिहिवार, कार्तिक १३ २०८३Oct 29 2026
आइतवार, फाल्गुण २ २०७७
नेपाल वाइड
खोटाङ । फागुन २, खोटाङमा कोभिड–१९ बिरुद्धको दोश्रो चरणको खोप अभियान सुरु गरिएको छ । पहिलो चरणमा कोभिड–१९ रोकथाम तथा नियन्त्रणकाक्रममा अग्रपंक्तीमा खटिएका स्वास्थ्यकर्मी, महिला स्वास्थ्य स्वयंसेविका लगायतलाई खोप लगाइएकामा दोश्रो चरणमा जनप्रतिनिधि, पत्रकार, कर्मचारी लगायतलाई खोप दिन सुरु गरिएको हो ।
जिल्ला अस्पतालमा स्थापना गरिएको केन्द्रबाट आइतबार दिक्तेल रुपाकोट मझुवागढी नगरपालिकाका मेयर दिपनारायण रिजालले कोभिड विरुद्धको दोश्रो चरणको पहिलो खोप लगाएका छन् । यस्तै, पत्रकारमध्येबाट एभिन्यूज टिभीका पत्रकार राजन ठटालले कोभिड–१९ विरुद्धको खोप लगाएका छन् ।
जिल्ला समन्वय समितिका प्रमुख बबी चाम्लिङको उपस्थितिमा कोभिड–१९ बिरुद्धको दोश्रो चरणको खोप अभियान सुरु गरिएको हो । तीन केन्द्रमार्फत आगामी फागुन ९ गतेसम्म जनप्रतिनिधि, पत्रकार, कर्मचारी, बैंक तथा संस्थानका कर्मचारी, जनपथ प्रहरी र शसस्त्र प्रहरीलाई कोभिड बिरुद्धको खोप दिइने स्वास्थ्य कार्यालय खोटाङका प्रमुख पुण्यप्रसाद सिग्देलले बताए । जिल्ला अस्पतालबाट हप्ता दिनसम्म खोप दिने व्यवस्था मिलाइएको छ ।
यस्तै, प्राथमिक स्वास्थ्य केन्द्र ऐसेलुखर्क र खोटेहाङ गाउँपालिकाको खोटाङबजारस्थित स्वास्थ्यचौकीबाट माघ ३ गतेदेखि ९ गतेसम्म कोभिड बिरुद्धको खोप लगाउने व्यवस्था गरिएको स्वास्थ्य कार्यालयले जनाएको छ । स्वास्थ्य कार्यालयका प्रमुख सिग्देलका अनुसार खोप लगाइएका व्यक्ती कसैलाई पनि साइडईफेक्ट देखिएको छैन ।
यद्यपी, केहीलाई थकान हुने, ज्वरो आउने, टाउको र जिउ दुख्ने समस्या देखिएको छ । औषधिले २० प्रतिशतमा सामान्य अशर देखा पर्ने स्वास्थ्यकर्मीको भनाई छ । खोटाङमा गत माघ १४ गतेदेखि २४ गतेसम्मको अवधिमा सञ्चालन गरिएको खोप अभियानकाक्रममा स्वास्थ्यकर्मी, महिला स्वास्थ्य स्वयंसेविका, कैंदीबन्दी, सुरक्षाकर्मी लगायत गरी ६९१ जनालाई खोप लगाइएको थियो ।
स्वास्थ्यकर्मीका अनुसार कोभिडको संक्रमणबाट बच्नका लागि पहिलो खोप लगाएका व्यक्तीले पुःन २८ दिनपछि अर्को खोपको डोज लगाउनु पर्ने हुन्छ । दिक्तेल रुपाकोट मझुवागढी नगरपालिकाका मेयर रिजालले कोभिडबाट बच्न र बचाउनका लागि खोप लगाउन आग्रह गरेका छन् ।
