खोटाङ । मंसिर २०, खोटाङको खोटेहाङ गाउँपालिकाले सामुदायीक विद्यालयका लागि शिक्षक छनौट गरेको छ । सामुदायीक विद्यालयका रिक्त दरबन्दीमा गाउँपालिकाले करारमा शिक्षक नियुक्ती गरेको हो । पाँच विद्यालयमा सात जना शिक्षक नियुक्तीका लागि शुक्रबार सञ्चालन गरिएको शिक्षक छनौट परिक्षामा तीन जना परिक्षार्थी मात्र उत्तिर्ण भएको गाउँपालिकाका अध्यक्ष प्रदीप राईले बताए ।

       भगवती दिनानाथ मावि खोटाङबजारमा मावि तहको विज्ञान शिक्षक एक जना, सप्तकन्य मावि चिप्रिङमा आधारभुत तहको अंग्रेजी शिक्षक एक जना र सावाकाली माबि सावाकटहरेमा प्राबि तहको एक जना शिक्षक उत्तिर्ण भएका छन् ।

       शिक्षकको रिक्त दरबन्दी पुर्तीका लागि गाउँपालिकाले बिणा माबि लिकुवापोखरीमा मावि तहको अंग्रेजी शिक्षक एक जना, सावाकाली माबि सावाकटहरेमा प्राबि तहको एक जना, भगवती दिनानाथ माबि खोटाङबजारमा माबि तह र आधारभुत विद्यालय तहको विज्ञान शिक्षक एक/एक जना, सप्तकन्य माबिमा आधारभुत तहको गणित–विज्ञान र अंग्रेजी विषयको एक/एक जना तथा महांकला आधारभुत विद्यालय लिच्कीराम्चेमा प्रावि तहको एक जना शिक्षक नियुक्तीका लागि परिक्षा सञ्चालन गरेको थियो ।

              शिक्षक हुने अधिकांश परिक्षार्थीले ५० अंक नै कटाएनन्

    रिक्त दरबन्दीमा शिक्षक नियुक्तीका लागि खोटेहाङ गाउँपालिकाले सञ्चालन गरेको शिक्षक छनौट परिक्षामा न्यून संख्यमा परिक्षार्थी उत्तिर्ण भएका छन् । पाँच विद्यालयमा सात जना शिक्षक नियुक्तीका लागि गरिएको परिक्षामा २३ जना परिक्षार्थी सहभागी हुँदा तीन जना मात्र उत्तिर्ण भएका हुन् । जम्मा २८ जनाको आवेदन परेको भए पनि पाँच परिक्षार्थी अनुपस्थित भएको गाउँपालिका अध्यक्ष राईले बताए ।

      वस्तुगत परिक्षामा कम्तीमा ५० अंक हाँसिल गर्ने परिक्षार्थी मात्र विषयगत परिक्षामा सहभागी हुन पाउने व्यवस्था अनुशार तीन परिक्षार्थीले मात्र वस्तुगत परिक्षा पार गरेका थिए । महंकला आधारभुत विद्यालयको शिक्षकका लागि ६ जना परिक्षार्थीको आवेदन परेको भए पनि सबै परिक्षार्थी फेल भएका छन् । शिक्षक उत्तिर्ण हुन नसकेको विद्यालयमा पुःन सूचना निकालेर हप्ता दिनपछि परिक्षा सञ्चालन गर्ने तयारी गरिएको छ ।

             शिक्षक छनौट परिक्षा निष्पक्ष बनाउन यस्तो जुक्ती

      शिक्षक छनौट प्रकृयालाई निष्पक्ष, मर्यादित र व्यवस्थित बनाउनका लागि खोटेहाङ गाउँपालिकाले गोलाप्रथाबाट छानिएका रोष्टर शिक्षकमार्फत शिक्षक छनौट परिक्षा सञ्चालन गर्ने विधि अपनाएको छ । परिक्षालाई निष्पक्ष रुपमा सञ्चालन गर्दै योग्य र क्षमतावान उम्मेद्वार छान्नका लागि गाउँ शिक्षा समितिले छानेका विषयगत रोष्टर शिक्षकलाई परिक्षाकै दिन खबर गरेर परिक्षा केन्द्रमा बोलाउने गरिएको छ ।   त्यसपछि गाउँपालिका, विव्यास अध्यक्ष, प्रअ लगायतले गोलाप्रथाबाट रोष्टर शिक्षकको परिक्षा केन्द्र टुंग्याएर प्रश्नपत्र तयार पार्न लगाइन्छ । प्रश्नपत्र तयार पारेर परिक्षार्थीलाई वितरण नगरेम्म रोष्टर शिक्षकको मोबाईल अफ गरेर राखिदिने गरिएको गाउँपालिका अध्यक्ष राईले बताए । परिक्षा अवधिभर परिक्षार्थीको मोबाईल पनि गाउँपालिकाले लिएर राखिदिने गरेको छ । न रोष्टर शिक्षकलाई आफ्नो परिक्षा केन्द्र बारे थाहा हुन्छ न त परिक्षार्थीलाई रोष्टर शिक्षक बारे नै थाहा हुन्छ । गोला प्रथाबाट छानिएको परिक्षा केन्द्रमा रोष्टर शिक्षकको आफन्त पर्न गएमा पुःन रोष्टर शिक्षकको केन्द्र परिवर्तन गर्ने गरिएको छ । ‘सत्तामा भएको बेला, पावरमा पुगेको बेला आफ्नो मान्छे राखिदिन पर्‍याे भनेर दवाव त आउँछ नै । तर उल्टो बी लेख्ने शिक्षक राखेर विद्यार्थीको भविष्यमाथि खेलवाड गर्न त भएन,’ गाउँपालिका अध्यक्ष राईले भने, ‘स्वास्थ्य र शिक्षामा अव्वल मान्छे ल्याउनु पर्छ भन्ने हाम्रो मान्यता हो । हामीले यसरी नै परिक्षा गराउदै आएका छौँ । परिक्षामा कसैले पनि खेलोमेलो गर्नै पाउँदैन । सेटिङ गरेको थाहा पाइयो भने क्रस गरिन्छ ।’ परिक्षाभन्दा अगाडि विद्यालयका प्रअ, व्यवस्थापन समिति, परिक्षार्थीबिचमा छलफल गरेर परिक्षामा ‘मिलेमतो’ भएको आशंका भए खुलेर आवाज उठाउन आग्रह गर्ने गरिएको छ । शिक्षक छनौट परिक्षाका लागि गाउँ शिक्षा समितिले कम्तीमा स्नातक गरेका शिक्षकमध्येबाट वार्षिकरुपमा आवेदन आव्हान गरेर रोष्टर शिक्षक छान्ने गरेको छ ।