बिहिवार, कार्तिक १३ २०८३Oct 29 2026
- ताजा अपडेट :
बिहिवार, कार्तिक १३ २०८३Oct 29 2026
आइतवार, जेठ ११ २०७७
नेपाल वाइड
आन्द्रामा इन्फेक्सन भएपछि सिकिस्त बिरामी भएका खोटाङको जन्तेढुंगा गाउँपालिका–६ दिप्लुङ (छुप्लुङ)का २४ वर्षीय तास्मिन राईको बचाउका लागि सहयोग अभियान चलाइएको छ । स्वास्थ्यमा समस्या आएपछि डेढ महिनादेखि थलिएका राईको जीवन बचाउका लागि आफन्त तथा शुभेच्छुकले सहयोग अभियान चलाएका हुन् । आन्द्रामा प्वाल परेको ठाउँमा इन्फेक्सन भएका राईको हाल विपी कोईराला स्वास्थ्य विज्ञान प्रतिष्ठान धरानमा उपचार भइरहेको छ । लकडाउनकैबीचमा अस्पतालमा आइसियूमा राखेर उपचार गराइरहेका तास्मिनको शरीरले गत शुक्रबारदेखि रगत समेत लिन नसकेको स्थानीय अगुवा जगत किरातीले बताए । शुक्रबार बेलुका शल्यक्रीया गरिएका राईको हालसम्म होस खुल्न सकेको छैन ।
तास्मिनको उपचारकाक्रममा आर्थिक समस्या भएपछि आफन्त तथा शुभेच्छुकले ‘तास्मिन उपचार सहयोग’ अभियान चलाएका हुन् । विभिन्न अस्पताल चाहार्नेक्रममा राई परिवारको हालसम्म ९ लाखभन्दा बढि खर्च भइसकेको छ । गाउँमा जगत किराती, मलेसियामा किशोर पुमा राई, कोरियामा दिपक राई, हाङकङमा भुपजित राई र धरानमा किरात पुमा राई तुप्खालाबांखाला सुनसरीका केदार पुमा राईले तास्मिनको उपचारका लागि सहयोग अभियान सञ्चालन गरिरहेका छन् । हालसम्म साँढे ४ लाखको हाराहारीमा सहयोग रकम संकलन गरिएको अभियान्ता किरातीले बताए ।
सुरुमा जन्तेढुंगा गाउँपालिकाकै प्राथमिक स्वास्थ्य केन्द्र चिसापानी, उदयपुरको गाईघाट हुँदै बिराट नर्सिङ होम बिराटनगर लगिएका राईलाई धरान पु¥याएपछि मात्र आन्द्रामा पुरानो प्वाल देखिएको र सो प्वालमा इन्फेक्सन भएको पत्ता लागेको हो । बिराट नर्सिङ होममा १८ दिन राखिएका राईको मिर्गौला र फोक्सोमा समस्या देखिएको भन्दै शल्यक्रीया गरेर फोक्सो र मिर्गौलामा जमेको पानी निकालिएको आफन्तले बताए छन् । उपचार गर्दा पनि निको नभएपछि उनलाई नर्सिङ होमले धरान रेफर गरेको थियो । धरान पु¥याएपछि पहिला लड्दा आन्द्रामा प्वाल परेको र सोही ठाउँमा इन्फेक्सन भएकाले समस्या निम्तिएको पत्ता लागेको थियो । सिकिस्त अवस्थामा पुगेका राईको श्रीमती र सात महिनाकी छोरी छन् । ‘हालसम्मको बिरामीको उपचारमा साँढे नौ लाखभन्दा बढि खर्च भइसकेको छ,’ किरातीले भने, ‘बिरामीको सहयोगार्थ रकम संकलन भइरहेको छ तर लकडाउनले अभियान चलाउन गा¥हो भइरहेको छ ।’
